Dhoolatus Socday Mudo lix saacadood ah oo ay soo bandhigeen Xoogaga Ahlusunnah ee Gobolka Gedo

14 07 2010
Cutubyo ka tirsan Ciidamada Culumaa’udiinka Ahlu sunna Waljamaaca ayaa saaka Dhoolatus ciidan ka sameeyay agagaarka degmada Beled xaawo ee Gobolka Gedo.
 
Boqolaal ka tirsan Ciidamada Culumaa’udiinka Ahlusunna waljamaaca oo dhawaan tababar loo soo xiray, isla markaana ku hubeeysanaa gaadiidka dagaalka ayaa saaka dhoolatus Meleteri ka sameeyay Deegaanada Unsi iyo Geed weeyne oo 15-kiilo Mitir u jira degmada Beledxaawo ee Gobolka Gedo.
 
Afhayeenka Culumaa’udiinka Ahlusunna ee Gobolka Gedo Sh.C/waaxid Sh.Aadan ayaa Saxaafada u sheegay in ujeedada Dhoolatuskaasi uu ahaa in loogu argagax geliyo Maleeshiyaadka Shabaab ee ku sugan qeybo ka mid ah gobolka Gedo, iyo soo bandhigida cududa ciidamada Culumaa’udiinka Ahlu sunna.
 
Afhayeenka oo hadalkiisa sii wata ayaa intaa ku daray in dhoolatuskaasi uu qaatay muddo lix saacadood ah, isla markaana uu sidii loogu talagalay ku soo dhamaaday, waxaa uuna Afhayeenku tilmaamay in arintani ay qeyb ka tahay barnaamijyo in muddo ahba socday oo dib loogu dhisayo awoodda ciidamada Ahlusunna ee ka howlgala gobolada Konfur galbeed ee dalkeena Soomaaliya, kuwaas oo sida uu sheegay qorsheeynaya in Maleeshiyaadka Shabaab ay ka xoreeyaan dhamaan Goboladaasi.
 

Xafiiska War-qabadka Ee Mustaqiim
Balad-Xawo, Gedo, Soomaaliya,
E-mail: mustaqiimcom@hotmail.