Culimada Ahlu-sunna Wal-jamaaca oo soo dhaweysay xayiraddii uu Sucuudigu ka qaadey Xoolaha Soomaaliya

Culimada Soomaaliyeed ee Ahlu-sunna Wal-jamaaca ayaa si diirran u soo dhaweeyey xayiraddii uu dalka Sucuudigu ka qaadey Xoolaha Soomaaliya ee uu kal hore ka dhoofsan jirey waddanka Soomaaliya.
 
Culimada ayaa ku tilmaantey Go’aankaas mid taabba-gal ah oo wanaajinaya xiriirka ganacsi ee labada Dal, taasoo qayb weyn ka qaadanaysa kobaca dhaqaale ee labada Dal guud ahaan iyo kan Soomaaliya gaar ahaan.
 
Waxay Culimadu sheegeen in Xayiraaddii uu Sacuudigu saarey Xoolaha Soomaaliya ay dhibaatooyin dhaqaale u keentey Waddanka Soomaaliya, qayb weyna ay ka qaadatey bur-burka iyo taag-darida wiiqday Shacabka Soomaaliyeed.
 
Waxay Culimadu sheegtey in dhaqaalaha Soomaaliyeed intiisa badan ay ku xirneyd Xoolaha Soomaaliya oo loo suuq-geyn jirey Siiladaha Waddama Khaliijka gaar ahaan Sucuudiga oo gaar ahaan xaddi badan qaadan jirey.
 
Waxay Culimadu sheegeen in maaddaama uusan waddanku wax soo-saar kale oo dibadda loo dhoofiyo lahayn, ay muhimmad weyn u lahayd Xoolahaas nool ee loo dhoofiyo waddamada Khaliijka.
 
Soo dhaweyntaas Culimada ayaa timid ka dib markii Dawladda Sucuudiga u oggolaatey shirkadaha Sucuudiga ee ka ganacsada Xoolaha Soomaaliyeed in ay bilaabi karaan Ganacsigoodii Xoolaha ee ay Soomaaliya ka keeni jireen.
 
Xiriirka kala iibsiga Xoolaha ee Soomaaliya iyo Sucuudiga u dhaxeeyey ayaa istaagey dabayaaqadii sagaashameeyadii ka dib markii uu Sucuudigu saarey xayiraad Xoolaha Soomaaliya taasoo uu Sucuudigu sheegey in Xoolaha Soomaaliya ay qabaan Cuduro.

 

 

 

 
Xafiiska War-qabadka Ee Mustaqiim.com
 
e-mail: mustaqiimcom@hotmail.com .