Khawaarijta Al-shabaab oo la wareegtey Idaacaddii Warsan ee ka hawl geli jirtey Magaalada Baydhabo

Ururka Khawaarijta Al-shabaab ayaa shalay la wareegey Idaacadda Warsan ee ka hawl geli jirtey Magaalada Baydhabo ee Xarunta Gobalka Bay.
 
Khawaarijtaan ayaa markii ay la wareegeysay Idaacaddaan waxay xoog ku soo galeen dhismaha ay ku taallay Idaacaddu, waxayna ku amreen in ay wariye-yaashu isaga huleelaan Idaacadda gudaheeda, haddii ay nolol doonayaan.
 
Markii ay la wareegeen Idaacadda ayaa waxay bilaabeen in ay raadiyaan dad idaacadda uga shaqeeya, iyagoo la’ ilaa iyo imminka qof kaga shaqeeya, isagoo qofkii ay u so bandhigaanba diidaya in uu ka shaqeeyo idaacadda.
 
Idaacadda Warsan ayaa waxaa Magaalada Baydhabo laga furey 5sano ka hor, iyadoo ilaa 5taas sano shaqeynaysay, waxaana iska lahaa Ganacsato Soomaaliyeed.
 
Lama oga ilaa imminka sababta loo xirey, hase yeeshee warar hoose oo halkaas ay Mustaqiim ka heshey ayaa sheegaya in ay Khawaarijtu doonaysay in ay la wareegaan Idaacaddaas iyagoo rabay in ay hawlahooda ku fushadaan.
 
Bil ka hor ayey ahayd markii ay idaacadda fariisiyeen, oo ka joojiyeen shaqadeedii, taasoo la saadaalinayey in ay la wareegi doonaan mar un, ayna soo baxday wararkii uu faafiyey websiteka Mustaqiim bil ka hor.
 
Hadda Idaacadda iyaga ayaa ganacta ku haya, markii ay waayeen wax uga shaqeeya oo saxaafadda yaqaan ayey waxay bilaabeen in ay Quraanka Kaliya ka sii daayaan maalinkii oo dhan.
 
Ma ahan markii ugu horreysay ee ay Khawaarijtu la wareegto Idaacaadaha xorta ah ee Soomaalidu ka abuurtay waddanka gudihiisa, waxay horey ola wareegeen Idaacado badan oo ay ka mid tahay idaacadda Andulus ee ka hawl geli jirtey Magaalada Kismaayo ee Xarunta Jubbada Hoose.

 

 

 

 
Xafiiska War-qabadka Ee Mustaqiim.com
 
E-mail: mustaqiimcom@hotmail.com