Tahriibeyaal Soomaali ah oo ay ka barakiciyeen Khawaarijtu Soomaaliya ayaa lagu dilay xadka u dhaxeeya Sacuudiga iyo Yemen

Dhallin-yaro gaareysa ilaa 12 oo ka barakacay dagaallada iyo Colaadaha ay ka hurinayaan waddanka Soomaaliya Ururada Khawaarijta ayaa shalay lagu laayey xadka u dhexeeya Sucuudiga iyo Yemen.
 
Dhallin-yaradaan ayaa markii la leynayey ka gudbayey xadka Yemen iyagoo ku sii jeedey Waddanka Sucuudiga, oo ay doonayeen in ay ka soo shaqeystaan ka dib markii ay wax shaqo iyo nolol ah ay ka waayeen waddanka Yemen.
 
Ciidamo taabacsan milatriga Sucuudiga ayaa ku amrey dhallin yaradaas in ay istaagaan, hase yeeshee dhallin yarada ayaa ka madax adeygay amarkaas, halkaas oo Ciidamadu rasaas qabadsiiyeen dhallin yaradaas.
 
Isla gobtaas ayaa waxaa ku geeriyoodey 11toban ka mid ah dhallin yaradaas, halka mid ka mid ah aysan rasaastu haleelin, oo uu ka badbaadey, isagoo isla markiiba dib ugu laabtey waddanka Yemen.
 
Xadka ay dhallin-yaradu gooynayeen ee u dhexeeyey labada waddan ee Yementa iyo Sucuudiga ayaa waxaa ka socda dagaal u dhexeeya labada waddan Ciidamadooda oo meel ah iyo kooxda Xuuthiyiinta oo meel ah.
 
Dagaalkaan ayaa socda muddo labo toddabaad ah, iyadoo labada dawladood ay doonayaan in ay waddanka Yemen ay ka sifeeyaan Shiicada, kooxda loo yaqaan Xuuthiyiinta, oo garab iyo dhaqaalo ka hela waddanka Eeraan.
 
Dhallin-yaradaas Soomaaliyeed ee Tahribka ahayd ayaa markii la laynayey loo maleynayey in ay yihiin dad ka mid ah garab yada halkaas ku dagaalamaya, maaddaama markii amarka la siiyey ay joogsan waayeen.
 
Dhibaatooyinka Shacabka Soomaaliyeed meel kasta ku haysata ayaa waxaa masuul ka ah Ururada Khawaarijta ee ku dul dagaalamaya Maatida Soomaaliyeed ee awal horey ula daalaadhacsanayd dhibaayinkii dagaalada Sokeeye.

 

 

 
Xafiiska War-qabadka Ee Mustaqiim.com
 
E-mail: mustaqiimcom@hotmail.com