SIDEE LOOGA CIIDEY GOBALLADA DHEXE

Waxaa maanta si wada jir ah looga ciidey isla markaana Salaadda Ciida lagu Tukaday Goballada Bartamaha Soomaaliya (Goballada Dhexe) ee dhammaanba hostaga Maamulka Culimada Soomaaliyeed ee Ahlu-sunna Wal-ajaamca.
 
Saakey ayaa markii waagii dillaacay hal mar shacabka goballada dhexe ku soo wada tooseen Takbiirta ka bilaabatey Masaajidda Waaweyn ee ku yaalla magaalooyinka kala duwan ee Goballada Dhexe.
 
Isla markii Shacabka Goballada dhexe ay maqleen Takbiirta Masaajidda ka socota ayey waxay bilaabeen in ay isugu soo baxaan shacabka halkaas ku dhaqan Fagaare-yaasha iyo masaajidda kala duwan ee ku kala yaalla Goballada dhexe.
 
Shacabka halkaas isugu soo baxay oo isugu jirey shacabka qaybihiisa kala duwan ayaa si wada jir ah kor ugu dhawaaqayey Takbiirta Ciiddul-adxada, waxay sidoo kale si wada jir ah ugu damaashaadayeen Farxadda Maalinta Ciidda Carrafo.
 
Magaalooyinka Maanta sida wada jirka ah looga ciidey ayaa ah dhammaan magaalooyinka hoostaga Maamulka Culimada Soomaaliyeed ee Ahlu-sunna Wal-jamaaca.
 
Farxad iyo Rayn-rayn ayaa maanta ka muuqatey dhammaan shacabka ku nool goballada dhexe, iyagoo carruurta, haweenka iyo dhammaan bulshada ay ka muuqadatey farxad iyo damaashaad.
 
Salaaddii Ciidda ka dib, Maamulka Culimada Soomaaliyeed ee Goballada Dhexe ayaa saakey hambalyo iyo bogaadin u direy dhammaan shacabka Soomaaliyeed meel kasta oo ay joogaan, iyagoo alle uga baryey in uu Shacabka Soomaaliyeed u naxariisto, abaaraha iyo colaadahana ka dul-qaado.
 
Waxay sidoo kale culimada Soomaaliyeed ka codsadeen Dhammaan shacabka Soomaaliyeed in ay u guntadaan sidii ay uga shaqayn lahaayeen nabadda iyo Musaalaxada, si markaas loogu helo waddanka Nabad waarta.

 

 

 
Xafiiska War-qabadka Ee Mustaqiim.com
 
E-mail: mustaqiimcom@hotmail.com