Maamulka Ahlu-sunna Wal-jamaaca ee Goballada dhexe oo soo bandhigey Maxbuus Khawaarj ah oo ay hayeen iyo Shiikh Abuu Yuusuf Al-Qaadi oo arrimo badan ka hadlay

1 02 2010
Maamulka Culimada Ahlu-sunna Wal-jamaaca ee Goballada dhexe ayaa shalay meel fagaare ah ku soo bandhigay Jaajuus Maxbuus ahaa oo horey ay Ciidamada Ammaanka Ahlu-sunna Wal-jamaaca gacanta ugu soo dhigeen.
 
Jaajuuskaan oo lagu magacaabo Maxamed C/raxmaan Axmed ayaa waxaa la soo qabtey 23-dii Bishii la soo dhaafey, iyadoo labo kale oo la socotey la toogtey markii ninkaan gacanta lagu soo dhigey.
 
Meesha lagu soo bandhigey ninkaan Khawaarijka ah aya ahayd meel fagaare ah oo ay ka soo qayb-galeen dhammaan qaybaha Bulshada kala duwan ee ku dhaqan Goballada dhexe si ay u arkaan ninkaas Khawaarijka ah ee ay kal hore Ciidamada ammaanka Ahlu-sunna wal-jamaaca gacanta ku soo dhigeen.
 
Sheekh C/laahi C/raxmaan Abuu Yuusuf Al Qaadi oo ah Madaxa War-faafinta Maamulka Culimada Ahlu-Sunna Wal-jamaaca ayaa isagoo War-fidiyeenka la hadlayey sheegey in ay ninkaan u soo bandhigeen Shacabka Soomaaliyeed si ay u arkaan.
 
Wuxuu kaloo Shiikhu ka war-bixiyey sidii ninkaan lagu soo qabtey iyo weliba siro badan oo uu ninkaan bixiyey oo ku saabsan hawl-gallada Khawaarijta, dadka la shaqeeya, Tirada Ajaanibta la socota, dadka xukuma iyo weliba meelaha ay hubka iyo dhaqaaluhu ka soo galaan.
 
Wuxuu kaloo Shiikhu ka warramay hawl-galkii Milateri ee ay Ciidamada Ahlu-sunna Wal-jamaaca ku qaadeen Magaalada Baladxaawo ee Gobalka Gedo, isagoo Shiikhu sheegey in halkaas Bidco iyo Khawaarij badan lagu laayey.
 
Wuxuu aakhirkii Shiikhu sheegey in ninkaas Maxbuuska ah ee Khawaarijkaa la soo saari doono Maxkamad, lagu fulin doono waxa ay Maxkamaddu soo go’aamiso.
 

Xafiiska War-qabadka Ee Mustaqiim
Dhuusamareed, Galguduud,
E-mail: mustaqiimcom@hotmail.com